USUM HUJAN DI JAKARTA

Pa Astahiam murak cengcelenganana.
Teu percumah geuning ngumpulkeun duit dalapan bulan teh, meunang opat juta leuwih, cukup meureun keur ongkos kareta jeung biaya hotel di Jakarta saminggueun mah, cenah.
Mang Udi, tatanggana, nanya: "Aya naon, Kang, make hayang nyaba ka Jakarta sagala? Jeung meuni rek saminggu cicing di hotel, rek ngilu taun-baruan?"
Pa Astahiam: "Cadu teuing Uing mah kudu pipilueun pesta taun baru sagala. Eta mah lain budaya urang."
Mang Udi: "Naha atuh meuni lila-lila teuing? Teu lebar miceun duit meunang hese-hese kukumpul?"
Pa Astahiam: "Pan usum hujan geus sabulan leuwih, meujeuhna we mun isukan Uing mangkat ka Jakarta. Sugan we kawenehan nyaksian nu aneh bin ajaib."
Mang Udi: "Naha rek nyanyabaan teh make kudu nungguan usum hujan?" 
Pa Astahiam nyanggereng bari ngasongkeun koran: "Hiiiih, maneh mah tara maca koran sih.Yeuh baca berita tadi isuk."  
Mang Udi molohok maca kalimat nu geus dicirian ku mangsi beureum: 
Penduduk DKI bersiap-siap menghadapi momok terbesar yang rutin menghantui mereka setiap musim hujan.